عجايب يا دنيا!!!
خلاص يا مواطنين مصر الكرام" الأوالب نامت والانصاص قامت" عايزيين يشيلوا الهرم الكبير من عجايب الدنيا السبعة!!!!!! يالا الكارثة المحدقة بمصير هذا الشعب الجليل! يالا الفاجعة المريعة الفظيعة الشنيعة!!!!!!!!
انتوا بتتكلموا بجد ولا أيه يا رجالة؟؟؟ هى فعلا مشكلتنا الوحيدة دلوقتي بقت ان الهرم مش هايبقى من العجايب السبعة؟ أنتوا أكيد بتهزروا؟؟؟؟ أصل مش معقول وسائل الأعلام تسيب كل حاجة وما تتكلمش غير عن الموضوع ده غير لما احنا نكون شعب حل كل مشاكله وما فضلهوش غير أنه يقعد في صالون ثقافي يناقش مشكلات عجيبة زي دي!!!! طيب وأيه يعني لما يطلع من العجايب السبعة ولا يتهد حتى ويتبنى بداله منتجع سياحي؟ أحنا مالنا؟ هو يعني كان عمل لنا حاجة؟ ماهو طول عمره موجود وقاعد وشايفنا بنتبهدل ليل نهار ولا عمره دافع عننا. طب ما هم باعوا عمر أفندي برخص التراب وسرقوا فلوسوا والهرم ما عملناش حاجة، غيروا الدستور غصبن عن عنين الي جابونا والهرم ما نطقش، سابوا الي غرَّق العبارة يطلع منها زي الشعرة من العجين والهرم ما اعترضش، هايخلوا بسلمته يمسك بعد اسم النبي حارسه وصاينه وبارده الهرم مازال" لم يحرك ساكنا"، يا عالم الله يخليكوا سيبوا الهرم في حالوا وخالونا في حالنا ، الهرم لا هايأكلنا ولا يشربنا، طب بلاش أحسن تفتكروني بكره الهرم ولا بيني وبينه ضدديات ولا حاجة، أنا هائولكوا، خالونا نحل كام مشكلة من الصغيريين الي عندنا الأول وبعدين نحل مشكلة الهرم، يعني مثلا نحل مشكلة البطالة، ولا الرعاية الصحية، ولا الخيبة الاقتصادية وبعدين أوعدكم أننا ننظر بعين الاعتبار للهرم الأكبر الجليل، وربنا يدينا ويديكوا الصحة وطولة العمر.
سلمى